Белозерьясо панжовсь од школа

Тонавтнемань од иесь белозерьянь эйкакштнэнь, сынст тетяст-аваст ды тонавтыцяст туртов кармась кавонзазь кенярксокс. Эдь тедеде сынст панжовсь од школа. Ней, Белозерьясо ташто корпусдонть башка ули эште вейке — од. Сон теезель «Образование» нацпроектэнть коряс ды кельгсти 165 эйкакшт. Тесэ улить ярсамонь, неень шкань вешематнень коряс теезь спортонь ды актовой нупальть.

Ташто школасонть, конась теезель 1978-це иестэ ды конась кельгсти 320 эйкакшт, кармить тонавтнеме начальной класстнэ, одсонть — покштнэ.

Школась карми роботамо ве сменасо — ней кельгить весе. Тедеде Ромодановань Белозерьянь школасо 366 тонавтницят. Васенце классов састь 39 эйкакшт.

Школань панжомань церемонияв сакшнось Мордовиянь Прявтось Артём Здунов. Мероприятиясь ушодовсь РФ-нь гимнасто. Артём Алексеевич шумбракстнесь Белозерьянь эрицятнень марто татаронь кельсэ.

«Минь панжтано школа, кона теезель россиняь Президентэнть проектэнзэ коряс, сюкпря сонензэ покш лезксэнть кис. Минь эрьва иестэ панжтнетяно од школат ды витнетяно пек ламо улезтнень эйстэ — те покш тев сень коряс, мекс ламотне эйстэдест эзть нее витнемат ламо иетнень перть. Тынк покш кеняркс — карматадо тонавтнеме од зданиясо, — пшкадсь Мордовиянь Прявтось тонавтницятненень. — Сюкпря теицятненень, конатне нурька шкас топавтызь те проектэнть. Монь ули мелем, штобу школась кармаволь велесэ притяжениянь куншкакурокс. Белозерьясь — веле сюпав кой марто, конатнень эряви кастомс-кепетемс. Ванстодо школанть ды эсенк тонавтыцянк — сынь свал кармить аштеме кисэнк каштанчисэ».

Артём Здунов домкасто ваннызе охранань нупаленть. Неень шкасто школатнесэ безопасностенть марто сюлмазь вешематненень велявтозь пшти вановкс.

Истяжо региононь ветицясь совсесь спортзалов, физикань, географиянь, Тиринь масторонь идемань ды безопасностень основатнень кабинеттнэнь, мастерскойтнень, медблоконть.

Лембе поздоровт Артём Алексеевич ёвтась васенце классо тонавтниця эйкакштнэнь туртов.