Башкортостан Республикасо юты «Межань ознома» раськень фольклоронь кенярксось!

Башкортостан республикань Бижбулякской буень Каменка велесэ аштемковонь 17-18-це читнестэ юты «Межань ознома» раськень фольклоронь кенярксось. Эряви тешкстамс, те вейсэнь теварсевкс, конань ютавтыть Бижбулякской буень социальной кемекстамонь Паронь теемань фондось, буень культурань фондось ды «Промкс» Башкортостан республикань Бижбулякской буесэ эриця эрзятнень ды мокштонень общественной вейсэндявксось. Ёвтазь теварсевксэсь изнясь Россиянь Президентэнь грант культурань, искусствань ды од шкинемань индустриясо теварсевксэнь ютавтомас. Проектэнь арсицятнень ули покш мелест вельмевтемс стувтозь кезэрень коенть, межа лангсо озноманть. Кенярсчинть лувсо юты Мордовиянь, Оренбургонь, Самарань, Башкортостанонь фольклоронь морокуротнень фестиваль. Невтевить раськень шкинемасо важодицятнень теевксэст, ютавтовить раськень налксемат ды пелькстамот, раськень оршамопелень, мазылгавтомань, седямопелень анокстамонь коряс мастер- класст. Теварсевксэнть прявт мелесь – вельмевтемс стувтозь кезэрень коенть, невтемс эрзянь ды мокшонь раськетнень культурань, койтнень- кирдатнень, раськень шкинемань мазычинть ды сюпавчинть. Минек региононть пельде «Межань ознома» раськень фольклоронь кенярксонтень моли весемень туртов содавикс ды вечкевикс «Мерема» фольклорной морокурось.