Башкириясо тешкстызь Масторавань чинть

Эрзянь ды мокшонь эпосонь кенярксось ютась тосо те таргонть.

«Масторавань» чистэнть Аурганзинской буень ловнома кудосо важодицятне ютавтсть флешмоб, конанть перть прянь невтицятне ловность эпоссто пелькст. Библиотекарьтненень вейсэндясть Башкириянь эрьва кодамо буестэ ловнома кудотнень ловныцятне.

А вана Наумкинской велень библиотекасо «Лисьмаприне» этностудиясо ютась «Матушка ты наша, Масторава» литературань-музыкань чокшнесь.

Эряви меремс, Башкириясо эриця эрзятне ды мокшотне ламо иетнень перть ванстыть тиринь келест ды покштятнень-бабатнень коест-кирдаст. Ламо буетнесэ теевить национальной куншкакурот, конатне лездыть эйкакштнэнень кастомс национальной искусстванть. Овсе а умок истямо куншкакуро панжозель Бакалинской буень Староиликово велесэ. Тосо ули краеведениянь музей, раськень тевдеематнень ды музыкань шкинеманть туртов нупальть.