Артём Здунов вастневсь СВО-нь участникенть Юрий Полобичев марто

МР-нь Прявтось Артём Здунов вастневсь СВО-нь участникенть, Мордовиянь СВО-нь ветерантнэнь вейсэндявксонь координационной советэнь прявтонть Юрий Полобичев марто. Вастовомасонть кортазельть республиканть боевой тевдеемань таркатнесэ боецтнэнь марто сюлмонь кирдемань кевкстематне.

СВО-нь ветеранось 2022-це иестэнть саезь кавксть совакшнось добровольческой отрядс, «парсейненть» удало весемезэ ютавтсь ие. Ней сон вети общественной важодеманть, ютавты вастовомат од ломантнень марто образованиянь учреждениятнесэ.

Юрий Полобичев пачтясь республикань Прявтонтень сюконямонь сёрма Мордовиясо чачозтнень пельде, конат примить участия Курской ёнксонь оборонасо, региононть пельде явозь гуманитарной лезксэнть кисэ. Икеле приграничной субъектэнтень гуманитарной лезксэнть лувсо пачтязель военнойтнень туртов весе эрявиксэсь, истяжо сёрмат Мордовиянь школатнесэ тонавтницятнень пельде. Теде башка явозь лезкс тосо эрицятненень, кить кадовкшность Курской областень нурька шкас улемань-аштемань пункттнесэ. Весемезэ те 20 тоннадо седе ламо лезкс Курскоень эрицятнень туртов ды 5 тоннат – Курской ды Белгородской ёнкстнесэ боецтнэнь туртов.

Артём Здунов ды Юрий Полобичев истяжо кортасть специальной военной операциянь Геройтненень кеврунгонь эскизэнть коряс, кона тедеде путови Саранскойсэ Изнямонь площадьсэнть.

Фото: официальный портал органов государственной власти РМ