Артём Здунов Россиянь Президентэнть Федеральной Собраниянтень Пшкадемадонзо: «Те Кучомась сехте виевтнестэ вейкесь»

Мордовиянь Прявтось Артём Здунов ульнесь Россиянь Президентэнть Владимир Путинэнь Федеральной Собраниянтень Кучоманть яволявтомань церемониясонть, кона ютась даволковонь 29-це чистэ Московсо, Гостиной дворсо. Тердезтнень ютксо ульнесть Федерациянь Советэнтень совицят, Государствань Думань депутатт, Правительствас совицят, губернаторт, общественной тевдеицят, СВО-нь участникть.

Промкссонть прявт нежедькст теезельть Россиянь суверенизациядо, экономикань ды регионтнэнь кастомадо-кепетемадо, ломантнень эрямост паролгавтомадо ды семиятненень лездамодо кевкстематнень лангс.

«Течи кортамось карми молеме аволь ансяк маласо шкантень арсематнеде, истя жо прявт тевтнеде, сеть кевкстематнеде, конатнень витемаст лован прявтокс масторонь кеме, куватьс шкань касоманть-кепетеманть туртов. Эрицятнень мелест-арсемаст, сынст бажамост ды кемемаст кармасть юрокс, нежекс сеть проекттнэнь, ушодкстнэнь туртов, конат улить яволявтозь течи. Весе арсезенть минь топавтсынек ансяк вейсэ», – тешкстызе Владимир Путин.

Башка мель явозель спецоперациянь ютавтомантень, сонзэ тевтнень топавтомань туртов вийтнень пурнамонтень.

Семиянь иестэнть Президентэсь эсь Кучомасонзо ламо алтась демографиянтень ды Россиянь семиянь ежомарямонтень. Владимир Путин яволявтсь «Семья» од нацпроектэнть нолдамодонзо, кона карми алтазь семиятненень лездамонтень, ды седе пек сетененень, косо трявить-кастовить ламо эйкакшт. Лезксэнть ютксо: пособият, ипотекань коряс льготань ставкат, эйкакш марто семиятнень туртов налогонь вычетэнь покшолгавтомась. 2030-це иенть самс поладови авань капиталонь получамга программась. Башка лезкс федеральной бюджетсэ карми явовомо регионтнэнень, косо чачтомань невтевксэсь седе алкине среднероссийскоенть коряс.

Артём Здунов мерсь Президентэнь Кучомадонть мейле: «Минь кандовтано сеть регионтнэнь юткс, косо улить демографиянь коряс алкуксонь стакачить – меельце 30 иетнень перть пек ламо ломанть тусть регионстонть, мезень коряс чачтомаськак республикасо аволь покш. Секскак минь, нама, соватано “Семья” ды ламо эйкакш марто семиятненень лездамонь коряс программантень».

Владимир Путин пачтясь, – малавгалиця 6 иетнень перть «Продолжительная и активная жизнь» од нацпроектэнть лувсо шумбрачинь ванстомань объекттнэнь строямонтень, витнемантень ды оснащениянтень карми явозь 1 трлн целковойде ламо, нолдави тевс эрицятнень репродуктивной шумбрачист ванстомань коряс программась.

Истяжо сы иестэнь ушодови эйдень кужотнень педе-пес витнемань программась. Бути кортамс школатнеде, Президентэсь путсь кармавтома – 2030-це иентень целанек пекстамс те стакачинть регионтнэсэ.

Тедеде тевс нолдави «Молодежь России» эште вейке национальной проектэсь.

Башка мель Президентэнь Кучомасонть явозель эрицятнень доходтнэнень, истя жо бюджетэнь сферань важодицятнень. Прявт смустесь – регионтнэнь ютксо зарплататнень авейкетьксчинть киртямось. Государствань прявтось яволявтсь кармавтома 2025-це иестэ анокстамс субъекттнэсэ бюджетниктнень важодемаст кисэ пандомань од лув.

Истяжо путозель кармавтома 2030-це иентень покшолгавтомс МРОТ-нть покшолманзо малав кавксть – 35 тежат целковойтнень видьс.

Стакачитнень ютксо – кадратнень анокстамось. Те тевенть витемась  карми молеме  «Кадры» од нацпроектэнть коряс. Сонзэ вельде келейгавтовить «Профессионалитет» программанть лувсо направлениятне, кемекстави школа-вуз-важодема вейсэнь тевдеемась, тееви неень шкань вадря база профессиянь получамонть туртов: СПО-нь учреждениятнень, вузтнэнь, общежитиятнень витнемась ды оснащениясь, наукань ды образованиянь куншкакуротнень кастомась-кепетемась. Эште 6 иес поладозь  «Приоритет 2030» высшей школань потенциалонь кастомань коряс программась.

Мордовиянь Прявтось тешкстызе: «“Кадры”» нацпроектэсь вечкевсь весенень, сень коряс мекс те топавтсы школасто саезь вузонть видьс сы шкань специалистэнь ветямонть ды, нама, токшесы профессиональной учреждениятнень».

Прявт мель Владимир Путин явсь наукасо ды промышленностьсэ Россисо технологической виевгавтомантень, пешксе суверенитетэнь топавтомантень. Эряви кавксть покшолгавтомс ярмаконь ютавтоманть исследованиятнень ды разработкатнень лангс, штобу малавгалиця шкасто масторонть улезэ весемесь эсензэ, ды 2030-це иентень киртямс импортонь пельксэнть 17% видьс, инвестициятнень покшолманть кастомс 70%-с. Тень марто вейсэ эряви кастомс важодемань производительностенть, покшолгавтомс производствань процесстнэнь технологичностенть ды роботизированностенть, искусственной интеллектэнть тевс нолдамонть.

Бизнесэсь истя жо кармась Кучомань прявт кевкстематнень ютксо вейкекс. Мелят Россиясо появасть вишка ды средней бизнесэнь ёнкссо 1,2 млн од компаният – те сехте покш невтевкс меельце 5 иетнень перть.

Государствань Прявтось ёвтась сюконямонь валт АПК-нь важодицятненень. Учоматнень ютксо, 2030-це иентень Россиянь АПК-нь производствань покшолмась касы нилеце пельксстэ аволь седе аламос 2021-це иенть коряс, экспортось касы вейке пель мартоксть. Поладови отраслянтень лездамось ды велетнень комплексной кастомань-кепетемань программань топавтомась.

Покш мель Владимир Путин явсь цифровизациянтень: нейке Россиясь – масторлангсонть васенце электронной лувсо государственной услугатнень явоманть коряс. Цифровизациянь коряс важодемась поладови  «Экономика данных» од нацпроектэнть лувсо.

Россиянь Президентэнть кортамонь прявт кевкстематнестэ вейкекс кармась регионтнэнь кастомась, васняяк сынст долгтнень покшолмаст киртямось. Сон яволявтсь бюджетэнь кредиттнэнь коряс регионтнэнь 2/3-де долгтнень нардамодост.

Государствань прявтось истя жо явсь мель налогонь системань важодемантень – учови фискальной системанть одкстомтомазо ды налогонь сталмотнень седе видестэ явомаст.

Владимир Путин явсь мель кочкамс эште 200 седе ламо покш ды вишка ошт – сынст ютксто эрьванть туртов улезэ анокстазь ды топавтозь эсензэ мастер-план (целанек виевгавтомань программась токшесы малав 2 тежат эрямонь пункттнэнь). Поладозь общественной территориятнень вадрялгавтомань-мазылгавтомань коряс программась – Россиянь келес 6 иетнень перть кармить одкстомтозь 30 тежадо ламо общественной таркат.

Башка мель явозель культурань ды туризмань коряс проекттнэнень, келейгавтовить Пушкинэнь картань возможносттне, 2025-це иестэнь саезь тевс нолдави «Земский работник культуры» программась.

Истядо Президентэсь яволявтсь  «Чистая вода» госпрограмманть поладомадонзо ды каладо кудотнестэ одс эрицятнень ютавтомань коряс од программанть совавтомадонзо. Государствань прявтонть кармавтоманзо коряс социальной газификациянь коряс программанть мереви нолдамс тевс сад-пирень товариществатненень. Целанек ЖКХ-нь одкстомтомантень явови 4,5 трлн целковойть. 2030-це иенть самс регионтнэнень явовить общественной эрьва кодамо транспортонь малав 40 тежат единицат, одкстомтови школань автобустнэнь паркось.

СВО-нь участниктнеде кортамсто, Владимир Путин тешкстызе: «Эряви, штобу сынь лисевельть прявт таркатнес од ломантнень образованиянь ды кастомань-превс путомань системасонть, общественной вейсэндявкстнэсэ, госкомпаниятнесэ, бизнессэ, государственной ды муниципальной управлениясо, улест регионтнэнь, предприятиятнень, отечественной сехте покш проекттнэнь прявтсо. “Элита” валось ламосо емавтызе смустензэ. Алкуксонь “элитась” – те сеть, кить служить Россиянтень, важодицятне ды ушмантнэ, кить тевсэ невтизь Россиянтень кемевиксчист». Государствань прявтось яволявтсь СВО-нь участниктнень туртов «Время героев» кадрань од проектэнть ушодомадонзо. Тосо прянь невтеманть туртов эярви каямс яволявкс 2024-це иень эйзюрковонь 1-це чистэнть саезь.

«Прявтось – те ломантнень питнень максомась, се, кода полавтови вадря енов сынст эрямост. Минь – вейке покш семия. Минь вейсэ, ды секскак тейтяно весементь истя, кода арсетяно ды бажатано теемс. Кеман минек изнямотнес, Россиянь вандынь чинтень!» – Кучоманть прядовомсто тешкстызе Президентэсь.

«Те Кучомась – сехте виевтнестэ вейкесь. Эйсэнзэ токшезь малав весе енкстнэ. Минек туртов прявтось: весе проекттнэ – ошонь территориятнень паролгавтомань, инфраструктурань одкстомтомань коряс – кармить важодеме 2030 иенть самс», – мерсь Артём Здунов.

Материалось анокстазь Мордовия Республикань Прявтонть пресс-службанзо материалонть коряс.

Фотографиясь — Мордовия Республикань Прявтонть пресс-службань.