Артём Здунов пшкадсь Мордовиянь Госсобраниянтень

Сундерьковонь 15-це чистэ Мордовиянь Прявтось Артём Здунов пшкадсь МР-нь Государствань Собраниянтенть.

Эрьва иень Пшкадемась ютась Саранскоень культурань дворецсэ Мордовия Республикасо Госсобраниянь 7-це созывень 42-це сессиянть лувсо.

Пшкадемань васенце пельксэсь алтазель специальной военной операциянь участниктненень ды сынст малавиксэст туртов. Мордовиянь Прявтось тешкстась, эряви топавтомс СВО-нь откертнень весе вешемаст, школатнесэ ды вузтнэсэ седе ламо ëвтнемс сынст ине тевдест, ютавтнемс лемезэст спортонь пелькстамот.

Нурькинестэ сень ланга, мезде мерсь Артём Алексеевич:

— Те иенть песэ кармить нолдазь тевс 15 од автобуст.

— Сы иестэ поладови ушонь-куронь валдомтомань тевесь. Арсеви полавтомс малав 3 тежат валдомтомкат.

— Сы иестэ Тёжа иень площадьсэ фонтанонть витнеманзо эряви прядомс.

— Сы иестэ Саранскойсэ теить онкологиянь больницянь од здания.

— Медицинань кото учрежденият витнемадо мейле кармить панжозь сы иенть пес.

— Республикань Прявтось кармавтсь региононь Минздравонтень анокстамс республикань буетнес ардтнемань медицинань лезксэнь максомань бригадат.

— Башка мель явомс важодема таркатнесэ шумбрачинь ванстомантень. Важодема таркатнесэ анокстамс здравпунктт, улезэ ков пшкадемс важодицянтень.

— Регионсто пандовить 100 тëжат целковойть 25 иес чачтыцятненень.

— Медицинань институтсо студенттнэнь туртов мекев велявтсызь военной анокстамонть. Тень кувалма ве арсемас прасть Оборонань министерствась ды Военно-медицинской академиясь.

— Мордовиясо маласо колмо иетнестэ витневить 55 школат ды 14 эйдень кужот. Тевесь топавтови федеральной бюджетстэ явозь ярмактнень вельде.

— Сы иестэнть Саран ошсо стявтови од школа 500 таркас. Сон карми важодеме 9-це школанть таркасо.

— Артём Здунов макссь МР-нь Минлесхозонтень кармавтома арсемс-теемс Инсар леенть ванськавтоманзо коряс од проект.

— Эсь Пшкадемасонзо Артём Здунов тешкстась: «Од ломантненень, тонавтницятненень эряви тонавтнемс фольклоронть, эрзянь ды мокшонь велетнень историяст» Истя жо тешкстазель, эряви топавтомс тонавтнемань ды краеведениянь проектт… Одтнэнень явома мель культурантень, историятень, койтненень. Содамс эсенек морыцятнень, артыцятнень, сермадыцятнень…

— Артём Здунов Госсобраниянтень Пшкадемасонзо тешкстась: «Миненек эряви содамс ды тонавтнемс эсь историянть». А стяко сы иесь минек Республикасо яволявтозь Историянь ледстнемань иекс («Год исторической памяти»)

— Сы иестэ топоди 155 иеть «кенярксчинь артыцянтень» Федот Сычковнень.

— Истя жо Мордовиянь прявтось мель явсь мирэнь-масторонь скульпторонтень Степан Эрьзянень. «Сонзэ лемезэ ды шкинемазо теизе раськензэ модамасторонь келес содавиксэкс», — тешкстась Мордовиянь Прявтось.

— Сы иестэ карми тешкставомо 80 иеть Ине Отечественной войнасо изнямонь чистэнть.

— Сы иестэ арсеви келейгавтомс ливтнемань географиянть Саранскоень аэропортсто.