Артём Здунов панжезень «Школа безопасности» Россиянь МЧС-ть межрегиональнай пялькстоманзон
Опубликовано Вайгель - 29.06.2022
Мордовиянь Оцюнясь Артём Здунов 28 июньцта сашендсь Большеберезниковскяй району, коса Россиянь МЧС-нь тонафнемань ошкять видеса панжевсть «Школа безопасности» межрегиональнай пялькстоматне. Синь ётафтовихть кефкиецеда ни.
Приволжскяй федеральнай округонь сембе субъекттнень эзда од спасательхне недяляньберьф кармайхть тюрема сяськомать инкса. Пялькстоматнень программаса – пожарнай эстафета, поисково-спасательнай работат, выживаниянь маршрут, перяфкс мархта полоса и лама лия.
Мордовиянь Оцюнясь поздравляндазень «Школа безопасности» пялькстомань участникнень и арьсесь сяськома.
«Эздонт тяса 23 команда – 230 ломань, тя оцю вий! Тинь лама содатада и машттада ни, тя пяк важна – улемс лац аноклафокс и маштомс экстремальнай ситуацияса араламс эсь прянтень и сятнень, кинди эряви лезкс, — мярьгсь Артём Здунов. – Пялькстоматне – тя нинге цебярь пинге корхнемс-тиемс, мумс ялгат, тонадомс мезеньге одняс. Катк сяськи инь виись!»
