Эйзюрковонь 13-це чистэ 15.00 ч. С. Эрьзянь лемсэ музейсэ ушодовить Федот Васильевич Сычковонь чачома чистэнзэ 155 иетненень алтавиця покшчинь мероприятиятне.

Экспозициясонть кармить пурназть музеень фонднэстэ живописень, графикань, декоративно-прикладной ды раськень искусствань малав 100 произведеният. Васенцеде невтевить К. А. Савицкиень лемсэ Пензань картинань галереянь, Ярославлянь художествань музеень, Владимирэнь-Суздалень историянь-архитектурань ды художествань музеень-заповедникень, Вологодской ёнксонь картинань галереянь кочкавкссо ванстовиця роботат. Невтемантень истяжо анокставить Сычковтнень кудораськентень кандовиця архивень документат, чуросто вастневиця открыткат, артефактт, ютксост туворт-эземть ды оршамот.