Саранскойсэ юты пильгеоскань коряс «Регионтнэнь кубкась»

Аволь профессиональной командатнень ютксо весероссиянь пелькстамотне ушодовить медьковонь 21-це чистэ ды кармить молеме 29-це чис. Эйсэст онкстасызь виест 8 командат, конатне ютызь эсь регионтнесэ ды лия регионтнэнь ютксо кочкамонь эскелькстнэнь.

Жеребьевкась, конась явинзе финалисттнэнь кавто группава, ютась медьковонь 14-це чистэ Москов ошсо Пильгеоскань кудосо.

«А» группантень понгсть Ростовонь Каменск-Шахтинск ошсто, Липецкойстэ, Карелиянь Кондопога ошсто ды Ставропольской енксонь Михайловск ошсто командатне. «В» группантень – Ивановасто, Санкт-Петербургсто, Дмитров ошсто командатне. Самай сынст марто карми онкстамо виензэ «МГУ-Талина» Мордовиянь командась, конась меельце шканть пек парсте невти прянзо.

Седе тов ютамонть туртов минек командантень эряви саемс тарка аволь седе ало омбоце таркадонть.

Меельце мачте ютыть «Мордовия Аренасо».