Саран ошсо панжовсь Индийской культурань куншкакуро

Мордовиянь Прявтось Артём Здунов медьковонь 4-це чистэ ульнесь Н. П. Огарёв лемсэ МГУ-нь пеле Индийской культурань куншкакуронть панжомасо. Сон теезь «Огарёв Арена» универсальной залсонть. Куншкакуронь прявт тевесь лездамс Индиясто студенттнэнень тонадомс лия масторсо эрямонтень, истя жо содавтомс Мордовиянь эрицятнень Индиянь культуранть марто. Н.П. Огарёв лемсэ университетсэ ней тонавтнить Индиянь 700 седе ламо эрицят, те сехте покш группась – 30% вузонь весе омбо масторонь студенттнэнь ютксо. 2020 иестэнть саезь ютавтовсть уш ниле нолдамот.

«Минек туртов покш честь панжомс те куншкакуронть, – тешкстызе Мордовиянь Прявтось. – Меельце колмо иетнестэ виевгавтынек вейсэнь важодеманть, ламолгадсть Индиясто студенттнэ. Икеле минек учи научной вейсэнь важодема биотехнологиятнень, ядерной медицинанть коряс. Кемевтсынь тетятнень-аватнень, конат течи тесэть, республикань Правительствась ды вузонь ректорось кармить тееме весементь тынк эйкакштнень сэтьмечист туртов, сыненст максовост мировой уровнянь содамочить. Сюкпря кенярксчинть кисэ, те пек питней минек эрицятнень ялгаксчист туртов!»

Индийской культурань куншкакуронть панжомасо ульнесь РФ-со Индия Республикань Посольствань образованиянь министрась господин Субрата Дас. «Монь туртов покш кеняркс улемс тесэ течи, – мерсь сон. – Россиянть ды Индиянть ютксо ламо вейкетьксчить. Мордовиянь Прявтось – минек вадря ялга, сонзэ содасызь минек масторсо, Посольствасо. Сюкпря Артем Алексеевичнень ды ректоронтень  Дмитрий Евгеньевич Глушконень куншкакуронь панжоманть кисэ. Кеман, сюлмонь эскелькстнэ кармить виензамо».

«Высшей образованиясь, культурась ды наукась малавгавтыть ломантнень, — тешкстызе Дмитрий Глушко. – Карматано тееме масторлангонть седе вадрякс!»

Университетэнть Индиянть марто наукань коряс вейсэнь важодемась келейгавтови. Мероприятиянь инжетне кортасть Индиясто студенттнэнь ды сынст тетяст-аваст марто.