Владимир Чибиркин евтась поздоровонь валт Изнямонь чинть марто Краснослободскоень буень ветерантнэнь туртов

Изнямонь чинть икеле Мордовия Республикань Государствань Собраниянь прявтось Владимир Чибиркин ардтнесь Краснослободскоень буев евтамс поздоровонь лембе валт кенярксонть марто Ине войнань ютыцятнень Александра Зарубинань ды Федор Горбаевень ды блокадас понгозь Ленинградонь эрицянть Сания Богдановань туртов.

«Изнямонь кенярксонть марто! Покш сюкпря тынк подвигенк ды весементь кис, мезе теиде минек туртов. Уледе шумбрат, эрядо седе куватьс, сэтьме менель прянк велькссэ», – арсесь Владимир Васильевич.

Владимир Чибиркин Краснослободскоень буень прявтонть Алексей Буйновонь, буесэ ветеранэнь вейсэндявксонь Алексей Шпагинэнь марто вейсэ казесть ветерантнэнень казнеть Мордовиянь Прявтонть Артём Здуновонь, Госсобраниянть, Мордовиянь депутаттнэнь ды «Единая Россия» регионсо партиянь отделениянть пельде.

Ветерантнэ вастсть покш инжетнень эсь кудосо мазыйстэ оршнезь, медаль марто мештест лангсо ды мизолкс марто чамаст лангсо.

Александра Зарубинань 1942-це иестэ кучизь важодемань фронтов, косо сон, овсе однэ, пилясь чувтот ды вачкась эйсэст рядсек.  Медицинань коряс курсань эрязасто ютамодо мейле 1943-це иестэ Александра Александровна понгсь фронтов, косо кармась санинструкторокс медсанбатсо, конась мольсь Якстере Армиянь частнень мельга.  Ветеранэсь а содасыяк, зяро ломанень эрямот идясь. Сон, мездеяк апак пеле, мольсь ятонть леднематнень алов сень коряс, мекс эрявсь таргамс минек ушмантнэнь тюремань паксятнестэ – ускозь, эсь лангсо.  Изнямонть Александра Зарубина вастызе Чехословакиясо. Войнанть прядомадо мейле сон эрямонзо перть важодсь здравоохранениясо. Мелят, сундерьковсто ветеранэнтень топодсь 100 иеть.

Федор Горбаев чачсь 1927-це иестэ. Фронтов понгсь 1945-це иестэ кода пулеметчик. Лия од ушмантнэнь марто сон кучозель Одер ошов, косо видьстэ поездстэ савсь вастовомс ятонть марто. Ульнесть стака тюремат, конатнесэ Федор Васильевич ранязель разрывной снарядонь покольсэ. Кода ледстни сонсь ветеранэсь, самай те поколесь ванстызеяк эрямонзо. Полконть эйстэ, конасонть ульнеськак Федор Горбаев, мезеяк, знамядо башка, се тюремасонть эзь кадово. Изнямонь чинть Федор Васильевич вастызе госпитальсэ. Войнадо мейле сон важодсь военной шоферокс. Кавто иес тукшнось рейдэв Кореясо конфликтонь зонатнев. 1952-це иестэ понгсь демобилизацияв.

Краснослободкоень буень Заречное велень эрицянтень Сания Богданованень савсь неемс Ленинградонь блокаданть. Сонзэ тетянзо-аванзо, чачозь Мордовиясо, тусть тов важодеме. Сания Алимовнань ульнесь овсе вишкинекс, ансяк сеть шкатнень пели нейгак ледстнемс. «Кода минь пелинек! Тынь а чарькодьсынкак. Те а евтави валсо. », – корты блокадницась. Минектнень вейке наступательной операциянь шкане сонензэ семиянзо марто удалась напустямс Ленинградсто Мордовияв. Тесэ Богдановтнень чачсь эште вейке эйкакшост. Сания Богданова свал роботась микшнемасо. Течи сонензэ 87 иеть.