Саранскойсэ тешкстызь Эрзянь келень весероссиянь чинть

Эрьва иестэ кенярксось эрсекшни чадыковонь 16-це чистэнть — чистэнть, зярдо 1894-це иестэ чачсь эрзянь васенце профессорось, кельсодыцясь Анатолий Рябов.

А. С. Пушкинэнь лемсэ ловнома кудосо пуромсть весе сеть, кить вечксызь эсь келест ды ламо путыть сонзэ кастоманзо-кепетеманзо туртов: тонавтыцят, национальной журналистт, сермадейть. Сакшность инжеть Ромодановань, Чаунзань, Покш Игнатовань, Лямбирень, Ордан, Отяж буетнестэ, Самара енкссто.

Поздоровонь валт пурнавозтнень туртов евтасть Мордовия Республикасо Государствань Собраниянь прявтонть советникесь Иван Москаев, Мордовиянь Культурань, национальной политикань ды архивень тевтнень коряс министранть васенце полавтыцясь Александр Карьгин, Эрзя-мокшонь раськетнень регионъютконь вейсэндявксонь прявтось Юрий Мишанин. Поздоровтнень марто вейсэ эрзятненень казезельть шнамонь коневт келень ды культуранть ванстоманть кисэ.

Кенярксось ютась парсте ды лембестэ. Седеяк эждизь седейтнень эрзянь кельсэ мазый гайтев моротне. Пурнавозтнень туртов морасть Г. И. Сураев-Королев лемсэ «Келу» фольклоронь ансамблянь солисткатне Анна Атласова, Елена Воронина, Антонина Масягина, Ирина Рузанкина, Мордовиянь филармониянь солистэсь Андрей Бочканов, моронь пелькстамонь ламоксть лауреатось Артём Мамаев «Ялгат» коллективензэ марто, «Ялганят» Ромодановань ансамблясь. Эрзянь кельсэ валморот ёвтнесь ероков тейтерькась Отяж буень Ламбаське велестэ Надя Аитова ды Ромодановасто тейтерькась София.

Эрзянь келень чистэнть паро коекс кармась кочкамс Анатолий Павлович Рябовонь лемсэ лауреат. Истямокс кармакшны се ломанесь, конась эсь оймевиензэ ды содамочинзэ максы эрзянь раськенть кастоманзо-кепетеманзо туртов. Тедеде лауреатокс кармась Владимир Кузьмич Абрамов. Сон — профессор, историянь наукань доктор, сермадей. Сонензэ максозель «Россиянь Сырнень толга» лауреатонь лемесь, «Эрзянь мастор» газетань аволь штатной корреспондент.

Чинть песэ, кода ветявсь, Эрзянь раськень койтнень-кирдатнень, келень ванстомань ды кастомань-кепетемань фондонь прявтось Татьяна Ларина ды фондонь лия важодицятне путсть цецят Степан Эрьзянь кеврунгонтень.

Покшчинть ютавтызе «Эрзянь раськень койтнень-кирдатнень, келень ванстомань ды кастомань-кепетемань фондось».