Н. П. Огаревонь лемсэ университетсэ тешкстызь Национальной оршамонь чинть

Кенярксось ютась вузсо чадыковонь 17-це чистэ. Сон вейсэндинзе студенттнэнь ды университетсэ важодицятнень. Эйсэнзэ невтизь пряст 13 масторсто студентт: Индиясто, Грузиясто, Йеменстэ, Лаоссто, Нигериясто, Белорусьстэ ды лиясто. Эрьва невтизе эсензэ масторонь национальной оршамонть мазычинзэ. А Россиянь студенттнэ эрзянь, мокшонь ды татаронь оршамкатнеде башка морасть эрзянь ды мокшонь морот.

Чинзэ перть вузонь факультетнэсэ ды институтнесэ ютасть акцият, алтазь Национальной оршамонь чинтень. Саемга, филологиянь факультетсэ ютась эрзя-мокшонь киштематнень коряс мастер-класс, медицинань институтсо – «Угадай национальный костюм по элементу» викторинась, аграрнойсэ – сехте вадря ярсамопелень коряс пелькстамо, экономическойсэ – раськень мазыльмань теемга мастер-класс.

Эряви меремс, Н. П. Огаревонь лемсэ университетсэ тонавтнить 54 масторсто студентт.  Вузонь прявттнэ-ветицятне явсть мель, конанть коряс эрьва ковонь колмоце понедельникстэнть студенттнэнень мереви сакшномс университетэв эсест раськень национальной оршамосо.