«Учитель, поэт, человек». Пушкинкасо невтезель Илька Морыцядо од книга

А. С. Пушкинэнь лемсэ национальной ловнома кудосо ютась «Учитель, поэт, человек» книганть марто содавтовомась. Книгасонть ёвтневи Илья Петрович Кривошеевень (Илька Морыцянь) эрямонзо ды шкинеманзо ланга. Арсемась сёрмадомс книга умок сась мельс сонзэ нинзэ Анна Семёновнань туртов.

«Учитель, поэт, человек» книгась – те эрзянь ине поэтэнть ланга ледстнемат. Книгасонть Илья Петровичень ледстнить низэ, тейтерезэ Ольга Ильинична, кона истяжо те чистэнть ульнесь ловнома кудосо, ялганзо, тонавтницянзо. Весе сынь кортыть ланганзо ансяк паро валт.
Мероприятиясонтькак евтазельть ламо лембе валт поэтэнть ланга. Пуромкшность зярыя инжеть. Ютксост ульнесть нуцьказо, Россиянь Сермадейтнень вейсэндявксонтень совицясь Анжелика Горбунова, тейтерезэ Ольга Ильинична.

Эряви меремс, книгась нолдазель 2019-це иестэнть, ансяк пандемиянть коряс савсь аламошкас шаштомс сонзэ марто содавтовоманть. Библиотекань важодицятне пурнасть мельстуиця невтема, алтазь Илька Морыцянень.

Илья Петрович Кривошеев чачсь 1898-це иень медьковонь 19-це чистэ Пензань енксонь Лопатинской буень Маяк хуторсо сокицянь-видицянь семиясо. Сонзэ авазо — Ефимия Петровна Кривошеева содавикс сказительницась. Самай сонзэ эйстэ поэтэнть тиринь келентень вечкемась ды сермадомантень ерокчись.

Илья Петрович – МАССР-нь заслуженной тонавтыця, СССР-нь Сермадыцятнень вейсэндявксонтень совиця. Эрямонзо сон алтызе тонавтомань ды сёрмадомань тевтненень.

Илья Петрович Кривошеев ульнесь эрзянь ды мокшонь поэзиянь ушодыцятнень ютксто вейкекс. Сон сёрмадсь ламо произведеният тиринь масторонть ланга, пертьпельксэнь мазычиденть, вечкемадо, ояксчиде. Сонзэ валморонзо лангс сермадозельть мороткак.