Саранскойсэ умарьковонь 10-це чистэ ушодызе важодеманзо «Покш перемена» Весероссиянь пелькстамонь полуфиналось

«Кода кортась классикесь: «Вовеки нельзя нашу дружбу разбить, нанизаны мы на единую нить» – истямо вейсэндявома ды ялгаксчи марто, конась ули проектэнь участниктнень ютксо, мереви топавтомс покш тевть! Эрьванть юткстонк уш улить ламо сюлмонзо – ванстодо сынст, муеде од ялгат, топавтодо проектт. Мордовиясо, лия регионтнэсэ тень туртов улить весе возможносттне», – мерсь республикань руководителесь Артём Здунов.

«Покш перемена» весероссиянь пелькстамось – Россиянь эйкакштнень ды од ломантнень туртов сехте покш проект. 2022 иестэ сонензэ вейсэндявсть малав 4 миллионт ломанть, ютксост 8-10-це класстнэсэ 1,5 миллионт тонавтницят. Те пелькстамосонть школасо тонавтницятнеде ды студенттнэде башка примить участия 160 тежадо ламо тонавтыцят. Саранскоев полуфиналонтень, конась карми молеме те таргонть прядовомс, пурнавсть Равчирень федеральной округонь 14 регионтнэнь представительтне.

Полуфиналонь пелькстыцятненень эряви невтемс содамочитнень, конат кармить эрявомо тенст неень шкань эрямосонть: командасо важодеме, аволь стандартной каршо валтнэнь муеме маштомась, шкинемань мельтне-арсематне ды организаторонь маштомачитне. «Покш перемена» пелькстамось ютавтови 12 енкстнэнь коряс. Эйкакштне командатнесэ теить кейсовой заданият, якить мастер-класстнэс, содавить содавикс спортсментнэнь, ученойтнень ды общественной деятельтнень марто.

Пелькстамонь колмоце сезононь финалонь пельксэсь ютавтови сундерьковсто «Артек» раськеютконь эйкакшонь куншкакуросонть.