Школань музейтнень пелькстамотнес састь 4 696 яволявтомат.

«Знание» вейсэндявксонь школань музейтнень пелькстамонтень састь 4 696 яволявтомат весе масторонть келес. Проектэсь анокстазь РФ-нь Президентэнть Владимир Путинэнь кармавтоманзо коряс РФ-нь Минпросвещениянть лезксэнзэ вельде.
Весемезэ пелькстамонтень састь 33 яволявтомат Мордовия Республиканть пельде. Региононть пельде сехте ламо максозь «Лучшая экспозиция, посвящённая памяти защитников Отечества» ды «Лучшая этнографическая / краеведческая экспозиция»номинациятнесэ. Тесэнь 23 музеень важодицятне тешкстызь, школасо тонавтницятнень туртов ютавтыть просветительской мероприятият, конат алтазь СВО-нтень.
Саранскоень 28 № школась невтизе Боевой Славань музеенть, конась алтазель Кузбассонь-Псковонь 376-це Краснознамённой стрелковой дивизиянтень. Музеень фондсонть 1349 экспонатт, сынст ютксо 732 алкуксонь предметт: Якстере армиянь боецтнэнь ды командиртнэнь сёрмат, документт, ули-парот, оружиянь пелькст, боеприпаст ды снаряжения, конат ускозь Советской Союзонь Героенть Михаил Девятаевень лемсэ «Память» школань поисковой отрядонь военно-исторической экспедициятнестэ.
Низовкань школась пурнась этнографиянь музей, конань коллекциясонть 350 ламо экспонатт: эрзянь-мокшонь кезэрень оршамопелень пешксе ансамбля, коень нардамот, кодамонь стант, пряхат, гигерень паргот, истя жо бивнят, пейть ды мамонтонь позвоноконь пелькст, конатнень велень эрицятне муизь тосонь латкотнестэ.
Лямбирской райононь Александровской школась невтизе курной кудонть одкстомтоманзо марто музеенть, косо пурназь кудоютконь кедьёнкст: самовар, чугунт, пряхат, горобия ды кедьсэ стамонь машинка. Башка пельксэсь алтазь ине Отечественной войнань иетнестэ земляктненень ды совавты фронтонь сёрмат, политруконь форма, офицерэнь планшет, каска, сапёронь койме, немецень каска ды тюремасо пелезь Мосинэнь винтовкань ствол.
Пелькстамонть лувсо музеень важодицятне уш ютавтсть 966 тонавтомань мероприятият 20 тёжадо ламо кунсолыцятнень туртов. Эйзэст совить экскурсият, интеллектуальной турнирт ды лекцият «Знание» вейсэндявксонь материалтнэнь коряс. Седе тов сыненст эряви ванстомс эксперттнэнь икеле тонавтницятнень марто важодемань практиканть. Меельце варчамотне ды каземань церемониясь ютавтовить ожоковсто «Память жива» форумсонть, конань анокстызь Юнармиясь ды Московсо Васенцетнень Движениясь. Тосо невтеви музеень сехте вадря практикатнень пусмось.
Весе участниктненень максови методической ды экспертэнь лезкс. Сынст туртов анокставить методической материалт школасо тонавтницятнень-экскурсоводтнэнь анокстамонть ды музеень важодемань ковкерьксэнь-тематикань аравтлувонть, экскурсиятнень ютавтоманть ды лиятнень коряс.истя жо пелькстыцятнень учить онлайн-вастовомат музеень ды архивень тевдеемань прявт специалисттнэнь, истя жо государственной музеень прявттнэнь ютксто наставниктнень марто.