Саранскойсэ ютась Эрзя-мокшонь раськенть регионъютконь общественной вейсэндявксонь Исполкомонь промксось
Опубликовано Вайгель - 30.01.2025
Тевесь ютась якшамковонь 30-це чистэ А. С. Пушкин лемсэ национальной ловнома кудосо.
Промксонтень сакшность эрзят ды мокшот-вейсэндявксонтень совицят Мордовиясто, Пензасто, Саратовасто, Самарасто, Чувашиясто, Ульяновскойстэ, Оренбургсто, Санкт-Петербургсто, Челябинскойстэ. Ульнесь РФ-нь Сенатороськак Петр Тултаев. Эряви меремс, те Исполкомонь 1-це промкс седе мейле, кода мелят сёксня Эрзя-мокшонь раськенть 8-це Съездсэнть кочказель од составось.
Мероприятиясь алтазель Мордовиянь автономиянтень 95-иетненень.
Пуромозтнень туртов невтсть Республикань теемадо документальной фильма, конанть анокстызь МР-нь Правительстванть пингсэ Гуманитарной наукань НИИ-нь учёнойтне.
Васолдо сыця эрзятне ды мокшотне, эрзя-мокшонь раськень автономиянь прявттнэ ёвтнизь, кода молить тевтне эрзянь ды мокшонь культуранть, историянть ды келнть ванстомга сынст регионтнесэ: кода ютась 2024-це иесь ды кодат мельть-арсемат путозть 2025-це иентень. Кодат тевть арсезть Мордовиясо, ёвтнизь Эрзя-мокшонь раськенть вейсэндявксонь прявтось Юрий Мишанин ды Исполкомонь прявтось Татьяна Ларина.
Мерояприятиянть песэ Исполкомонтень совицятнень туртов невтезельть кавто од книгат. Вейкесэнть пурназть Эрзя-мокшонь раськенть регионъютконь общественной вейсэндявксонь VIII-це Съездэнть коряс материалтнэ (эряви меремс, истямо книга лиссь васенцеде). Омбоцесь алтазь эрзятнень-мокшотнень раськетнень тешкстнэнень (родовой знактненень).
