Отечествань Геройтнень чистэнть Саранскойсэ ютась ушмантнэнень, конат чачсть Мордовиясо, кеврунгонтень цецянь путомань церемониясь

Сараснкойсэ Изнямонь площадьсэ ютась мероприятия, кона алтазель Тиринь масторонь Откерень чинтень. Церемониясонть невтизе прянзо Мордовиянь Првятось Артём Здунов. Сон путсь цецят чачозь Мордовиясо ушмантнэнень, конат кулость Ине войнань шкатнестэ, кеврунгонтень ды чатьмонезь ледстинзе Тиринь масторонь Откерьтнень.

Теде башка, кеврунгонтень путозельть цецят Мордовия Республикасо Госсобраниянть, Мордовия Республикань Прявтонь Администрациянть ды Правительстванть, Мордовиянь Митрополиянть, Саранскоень Администрациянть, СВО-нь, боевой действиянь прянь невтицятнень ды сынст кудораськест, военнослужащейтнень, Мордовия Республикань правоохранительной органтнэнь, ветеранонь, религиянь, од ломанень ды общественной вейсэндявкстнэнь пельде.

Седе тов весе ледстизь ушмантнэнь, конат тусть эрямостонть тиринь масторонть идязь, чатьмонемань минутасо. Гайгезевсь РФ-нь гимнась.

Ледстясынек, Тиринь масторонь Откерьтнень чись Россиясо тешкстави эрьва иестэ ацамковонь 9-це чистэ. Кенярксось алтазь ушмантнэнень, конат васнтыть минек масторонь границатнень; врачтненень, конат мезеяк лангс апак вано, идить солдаттнэнь ды офицертнэнь эрямост; важодицятненень, конат теить изнямонть тылсэ; доброволецтнэнень, конат лездыть минек идицятненень.

Мордовиясо зярыя чачицят тусть Масторлангонь I-це ды Ине войнатнес, кармасть РФ-нь территориясо ды лия мастортнесэяк военной конфликттнэнь зонатнесэ боевой действиясо пря невтицякс. Ламот эзть са тосто мекев. Течияк Мордовиянь цёратне — алкуксонь геройть, конат мездеяк апак пеле идить минек масторонть ды ломантнень эрямост.