Транспортонь интеллектуальной системанть лангс Мордовиясь получи малав 40 млн. целковойть

Ярмактне сыть федеральной бюджетстэ. Теде кармавтоманть сёрмадстызе Россиянь Правительствань Прявтось Михаил Мишустин. Весемезэ программанть топавтоманзо лангс карми явозь 200 млн целковойть. Неть ярмактне кармить явозь Россиянь 6 регионтнэнь юткова. Мордовиядо башка тей совасть Северной Осетяись, Чечнясь, Архангельскоень, Курскоень ды Нижний Новгородонь ёнкстнэ.

Финансированиясь лезды минек республикантень эрязкавтомс неень шкань системанть совавтоманзо эрямос. Од технологиятне лездыть ваномс транспортонь ардоманть мельга онлайн-режимсэ, нолдамс киулотнень лангсо седе ламо машинат, нурькалгавтомс шканть, конанть ломантне ютавтыть ки лангсо, ды, нама, кепетемс безопасностенть.

Транспортонь коряс Государствань комитетэнь Прявтонть Валерий Кандринэнь валонзо коряс, иень пентень финасированиянть коряс Саранскойсэ одкстомтовить 23 светофорт,  кармить теезь видеонаблюдениянь 145 камерат ды транспортонь 100 детекторт. Рамить коммутаторт, сервер, эрявикс программат. Неень шкасто моли китнень лангс весементь путомазо.

Весе информациясь тосто карми молеме Дорожной движениянь куншкакуронтень.