Мордовиянь национальной радиось Мордовиянь национальнай радиось


КИЗЭСЬ ЮТАСЬ – ТИКШЕСЬ ПУРНАЗЬ! ШКА – СИМЕМС ТАНТЕЙ ЧАЙ!

 

 

 

 

 

 

 

 

 

 

 

 

 

Кизэсь, кода весе содасызь, сюпав эмежсэ-сюросо, эрьва кодамо мастумарьсэ ды, нама, тикшесэ. Паксянь тикшетне – те, васняяк, лезэвчи. Эйстэст теить эрьва кодат надобият эрьва мезень ормань менстямга. Ды арась кодамояк салавачи – лавкасто рамазь чаесь а полавтсы сень, кона теезь тикшестэ. Кодат технологият эрявить содамс чаень теемстэ? Кода витемс шумбрачинть эрявикс тикшесэ, ды стувтомс аптекав кинть? Кода вадрясто удомс ды неемс мельстуиця онт? Тенде парсте соды Артем Петров тикшень пурныцясь. «Вайгель» радиопрограммась пачколесь тензэ инжекс Кочкурбуень  Семилеев.

 

Артем, витькстак, кода умок тонь седейсэ кирвазсь тикшетненень вечкемась?

 

–Тикшень пурнамо ушодынь эйкакшпингестэ. Мон чачинь ошсо, а касынь велесэ, сырькайтнень кедьсэ. Мон – эрзян. Тетям – эрзя. Сон чачсь Семилейсэ. Сеедьстэ вишкинестэ монгак ардтнинь бабанень, ды нейгак, кода несак, тесан. Омбоце сырькаем – Торбеевань мокшава. «Пыль китайских дорог» (истя Артем корты рамазь чайде) кудосо минь зярдояк эзинек симне. Сырькайтнень марто, седе ламо Торбееванценть, свал якинек паксява ды вирьга тикшень пурнамо.  Сынь евтнесть монень тикшетнень лезэвчидест.  

 

Тикшетнень ютксо улить вечкевикст?

 

– Мон вечкса нартемксэнть. Вечкеви сонзэ чинезэ. Те тикшесь – пек виев лезэв енксонзо коряс.

 

– Костят теленень? Мон ванса тонь  те тикшеденть верьга пек ламо понгавтозь?

 

– Арась. Седе пек кирдян, кода мазыйгавтомапель ды, нама, чиненть кисэ. Сайнян баняв, аромапрактиканть туртов. Эйстэнзэ тейнян порошок: човорян нартемксэнть сезял тикшенть ды сыряжнянть марто. Истя ванськавтови рунгонь потмось. Порошокось лиси пек сэпей, секскак «кургозот а саеви». Пек паро теемс капсулат. Истя седе шождасто нилеве.

 

А тон рамсят лекарстват аптекасто?

 

– Арась, а рамсян.

 

– Лисни, бути весе тикшетне – ормань менстиця паро надобият, тон маштат кочкамо юткстост эрявикс, саемга, кирьгапарень орматнень эйстэ?

 

– Истя. Тенень эряви содамс, мейсэ ломанесь сэредсь вишкинестэ ды кодамо сонзэ верезэ. Ансяк мон те тевенть марто а сюлмсеван, бути кортамось моли лия ломантнень ланга. Практикасон те арась. Мон, седе пек, – тикшень кочкиця.

 

– Тон тенень тонавтнить?

 

– Арась. Образованиянть коряс мон энергетикан. Тикшень пурнамось ды чаень теемась – мельспаросо юткошкань ютавтома. Истя меремс, оймень витеманть туртов.

 

Артем, евтык, зярдо ушодови тикшень кочкамось?

 

–  Шкась свал полавтневи. Те кодамо иесь пры. Эрьва тикшентень – эсензэ шка.  Эйзюрковсто кочкить килеень пургондавкст. Чадыковсто – цецяпрят, одавань тикше, пеште чувтонь пилекст. Сексня, зярдо седе ламо юткошкам, пурнан тюжа цецянь, тазкоренонь, боза тикшень ды лия ундокст. Тесэ эряви ваномс ковонь фазанть лангс. Те пек эрявикс тевесь. Мон ванан ковонть мельга: кода сон карми пешксе, саян койме, сеск кадан весе тевем  ды эрязасто ардан вирев.

 

– Чить, арсян?

 

– Нама, чить (авт.: мизолды). Ардан ундокстнэнь таргамо. Пешксе ковонть шкасто сынст потсо сехте ламо лезэв микроэлементат ды эфирной ойть. Ве чи алтат те тевентень – иес таштат.

 

Артем, ней тонь ули тикшень костямга ды чаень теемга эсеть производства. Кода те ушодовсь? Умок?

 

– Ушодовсь те аволь пек умок – 2015-це иестэ. Сестэ мон понгинь «Инерка» бизнес-форумов.  Теевинь содавиксэкс эрявикс ломань марто. Ледстнян, эринек лагерьсэ палаткасо. Тов сакшность Россиянь лия регионтнестэ спикерт ды преподавательть, конат евтнесть тенек эрьва кодат паро мельть-арсемат эсь тевень ушодоманть ланга. Сынь ютавтнесть тренингть, бизнес-пелькстамот; тейнесть нетворкингт, аутотренингт. Вана истя, сестэ, мелезэм ледсь сырькайтнень марто паксява якамось. Ды мон «кирвазинь» те арсемасонть. Мон ловнынь ламо эрявикс книгат, ванынь ды ванан эрьва кодат мастер-класст. Свал сюпалгавтан содамочим вечкевикс тевенть коряс.

 

– Самай сестэ тон ушодыть, истя меремс, «профессионально» тееме васенце чайтнень. Содаса, те ульнесь ерохейтикшень чаесь. Истя?

 

– Истя. Сестэ аламодо седе стака ульнесь. Кодамояк оборудования тень туртов арасель. Тикшень лопатне коськсть седе стамбарнэ.

 

– Ней ванса, Артем, тесэ тонь цела производства. Евтнек весемеде мельга-мельцек.

 

– Чаень теемсэ, весемезэ, 4 эскелькст. Васняяк, тикшесь пурнама. Молема паксяв, вирев.

Седе тов лопатнестэ эряви ливтемс а эрявикс летькенть. Малав 30 %. Лопатне костямат.  Эряви тешкстамс, те кизэнть, окойники, монь появась ерохейтикшень лопань костямонь  аппаратось (авт.: невтни монень). Куватьс арсинь ды вешнинь ломань, кона машты сонзэ тееме, а лиссь – сонзэ вешнемскак эзь эряво, эрясь шабра велесэ, ней тесэ, Семилейсэ. Покш сонензэ сюкпря. Лопатне каявить аппаратонтень ды механизмась ушоды эсь тевензэ. Истя ерохейтикшень лопатне коськить седе эрязасто.

 

– Ламо шка тень лангс туи?

 

– Тень лангс тукшны малав 6 част. Эряви ваномс пертьпельксэнть лангс. Бути пси ды коське – эрязасто лопатне пужить, а вана бути летьке – сестэ седе куватьс учома.

Мельга молиця эскельксэсь – лопань тапардамось (процесс скрутки чайного листа). Тенень эряви 30-шка минутат. Бути коштонь давлениясь алкине ды арась чипай, лопась а тапардави. А миненек эряви «яжамс» тикшень клеткатнень ды ливтемс начконзо. Те эскелькссэнть – чаень лопанть мазычись. Мон ламо важодян тень лангсо. Эряви, штобу лопась мазыйстэ тапардаволь. Мезекс те эряви? Зярдо коське лопатнень каясыть лаки ведентень, сынь стамбарнэ ды мазыйстэ потсонзо панжовить.

 

Артем, а неть партне мезекс эрявить.  (авт.: невтян чувтонь партнень лангс, конат аштить туворонть ало)?

 

– Вана самай сынь эрявить мельга молиця эскельксэнть туртов. Ферментациянтень. Пекшень партнень теинзе содавикс чувто ланга керсицясь Петр Рябов. Мон арсян варчамс лия чувтостояк теезь парть. Те максы чаентень лия чине ды тансть. Вансынек, мезе тень эйстэ лиси. Сеске мерян, тикшень лезэв енкстнэ а емить.

Чаень лопанть мон, сехте сеедьстэ, путан поень парьс, 8 часос. Те шканть мон кочкия монсь. Тейнинь экспериментт Чижевскоень лампанть-коштонь ионизаторонть лезксэнзэ вельде. Ванынь лопанть лангс микроскопонть пачк. Кой-кить кирдить кавтошка чить. Мон – 8 част. Те саты. Эряви меремс, ферментациясь карми молеме ансяк лембе таркасо – 15 °С ды седе ламо. Якшамосо тевесь а лиси.

Ферментациядо мейле лопатне, нама, начкот. Сынь эрявить костямс. Лиякс – чапашкадыть ды а кармить маштовомо. Лопатнень мон вачкан лотокс ды путан костямонь шкапс. Тесэяк улить салавачить. Аволь весе тикшетне вечкить сэрей температурат. Пек костявтомс а эряви. Сестэ лезэв енкстнэ емить. Саемга, ерохей тикшенть мон костян 70 °С температурасо 3 часонь перть.  Сеске мерян, весементь седе паро теемс пси ды коське шкане. Зярдо летьке, бажан теемс кодаткак лия тевть. Саемга, тенсть баняв.

 

– Артем, улить сеть, кить рамсить чаенть тонь кедьстэ свал?

 

–  Улить. Те аволь ансяк велень ломанть. Ерохейтикшень чай монь кармасть рамсеме Саранскоень кой-кона кафетне ды ресторантнэ. Ды, сынст валост коряс, ламо инжетне велявтыть сыненст чаень симеме. Аштян мельспаросо тень кувалма.

 

– Неень шкась, кона сюлмазь коронавирусонь эпидемиянть марто, кадынзе ламотнень важодема таркавтомо, ярмактомо. Тонь кода тевтне тень марто ульнесть? Стакачинть марик эсеть лангсо?

 

Видьстэ меремс, арась. Мекевланг, лездась кода-бути. Орматнень марто ломантне кармасть рамамо седе ламо тикшень чайть.  Чайтнеде монь малав 40 позицият. Сексня яла лован, зяро мезе ули. Тикшетнеяк эрьва кодат пурнатано.

 

– Стака? Лездыцят улить?

 

– Козяйкам лезды ды велень 5 церынеть. Монь журналомгак ули. Тов сермадан, кие зяро ды мезе пурнась.

 

– Саемга, мезе тедеде ламо ульнесь? Кодамо тикше?

 

– Мон ардтнинь Кочкур буень ламо паксятнень ды виртнень. Кода тешкстынь, пек ламо ульнесь чай тикше, цяпор.

 

– Кочкур буеде башка, куваяк ардтнят тикше мельга?

 

– Кода эно? Покш Вьясось, Березниктне, Торбеевась – пек паро таркатне.

 

– Зярс моли тикшень пурнамось?

 

– Кизэнть пес. Саемга, пейделькатне истя касыть. Минек ули эсенек паксянок, ков озавтнетяно те цецянть. Течи пек стака муемс аптекасо алкуксонь ромашка. А сонзэ, эряви меремс, сеедьстэ рамсить. Аптекань пейделькась човорязь ламо лия тикше, видсть, мода, кевть ды мик унжа марто. Ды те чарькодеви, комбайнатне ды трактортнэ а кармить кочксеме вейкень-вейкень. Тосо покш производства. Ансяк парочиськак тенде а кадови «пейделькань» чайсэнть. А мон цеця прятнень домкасто пурнан. Костян сынст а покш банясо, конанть арсия монсь. Лездасть тетям ды покштям.

 

– Артем, а чайде башка мезесь лезэв рунгонтень?

 

– Тейтяно комолянь тодовт. Сынь лездыть парсте удомс. Эряви меремс, тикшетнень ютксояк, эрсекшнесь, пек парсте матедевкшневинь (авт.: мизолды). Тедеде вана теинек эрьва кодат вареният: пичеумарень, инзеень, раужо шукшторовонь, мастумарень ды пиже помидорань.

 

Ммм… Нама, пек тантей. Паряк, ярсамопелень  выставкав-невтемав свал тердить эйсэть?

 

– Невтемав кармасть тердеме эйсэнь 2018-це иестэнть саезь – «Золотая осень» ВДНХ-со. Мелят ульнинь Московсо, «Золотая осень» выставкасо; «АгроТех-Мордовия 2020» регионъютконь невтемасонть. Теде башка, эрьва иестэнть Сараснкойсэ юты «Чайные бега» благотворительной акциясь.

 

– Сюкпря, Артем, кортамонть кисэ. Ней ковкерькссэнть сексь, таштамков. Нама, те шкас ерохей тикшень чаень микроферментацияськак ютась ды самай шка сонзэ симемс.

 

 

Валкс:

 

Аутотренинг (кез. грек.. αὐτός – «сам» ды англ. «training» – «обучение, воспитание, тренировка» валтнэнь эйстэ), рузокс множество методов психологической саморегуляции и самосовершенствования. 

Боза тикше – валериана

Ерохейтикше – иван-чай, кипрей

Нетворкинг (англ. «net – сеть + work – работать, полезные связи» валтнэнь эйстэ), рузокс – прогрессивный способ построения деловых связей; умение заводить знакомства с нужными людьми для развития карьеры, бизнеса.

Одавань тикше – мать-и-мачеха

Пейделька – ромашка

Пичеумарь – сосновая шишка

Пургондавкс – почка

Сезял тикше – пижма

Сыряжня – тысячелистник

Тазкорён – девясил

Тюжа цеця – тесэ, одуванчик

Ундокст – тесэ, корневища

Цецяпря – соцветие

Цяпор – душица

Чай тикше – зверобой

Шукшторов – смородина

 

 

 

Ольга Шабанова

Тов

Другие статьи

Где бы поработать?

Сотни выпускников и школьников из года в год задумываются о своей будущей профессии. А с развитием интернета одновременно и сложнее и проще стало следить за популярностью профессий. Благодаря ему можно легко определить востребованность ...

IFUSCO-сь нинге весть кочказень марс финно-угратнень

IFUSCO – тяфта лемоц народъётконь конференциять, кона аноклави и ётафтови финно-угратнени. Тядде сон 35-цесь. Колмогемонь ветексть ни кочкавихть марса од ломаттне масторлангонь эрь кодама уженяста и масторлангонь эрь кодама уженяс. Ётай ...