Мордовиянь национальной радиось Мордовиянь национальнай радиось

Саранск:0°

вечером: 0° завтра: 0°



IFUSCO-сь нинге весть кочказень марс финно-угратнень

IFUSCO – тяфта лемоц народъётконь конференциять, кона аноклави и ётафтови финно-угратнени. Тядде сон 35-цесь. Колмогемонь ветексть ни кочкавихть марса од ломаттне масторлангонь эрь кодама уженяста и масторлангонь эрь кодама уженяс. Ётай кизонда финно-угратне пуромкшнесть Эстонияв. Тядде IFUSCO-нь ётафтома вастокс арась Австриясь – Венань университетсь. Вете шиста (23-27 апрельста) васедсть фкя вастса ёфси аф фкя лацонь и сяка пингть мала ломаттне. Ётксост улень монга.

Тя пуромкссь ичкозе аф васенцесь монь эряфсон. Но сон аф малады лияннетненди. Тяряфтан азондомс мес. Васенцекс, сяс мес ётнесь аф Россияса. А ёфси лия масторса, ськамот, пряценьге марясак лиякс. Марясак кода ёмладонга ёмла ломань, кона сембода тёждять – кяльтьке аф содасы. Но сяка пингть кона эрьгав и, мярьголень, оцю.

Васенда тейне аф пяк шарьхкодевсь, мес тяфтама форумсь ётафтовсь Австрияса (ёфси аф финно-угрань масторса). Меле содайне: тоса тяфта же ули финно-угрань кафедра, коса тонафневихть малавикс тейнек кяльхне.

Марнек эздонк ульсь 130 ломань маласа. Россияста сашендсть, улема, пялешкасна. Сембода оцю делегациясь ульсь Удмуртияста – 30 од ломань (кирдемок кунара финно-угратнень мархта соткс, мон ба азолине – удмурттне най сембода активнайхне). Комитне ульсть сисемшканнест. Марий Элста аньцек колмошка ломань. Аф содаса мес, карелхт тядде ёфси ашельхть. Сембода лама финно-уграда ульсть лия масторста – Финляндияста, Венгрияста, Эстонияста. Ульсть и стапт, конат финно-угратненди кодамовок ширде аф маладыхть. Кепотьксонди, ётксоноктольхть француст, американецт, японецт, украинецт и стак тов.

Мордовияста улень ськамон (но тяфта мон аньцек арьсень). Докладозень азондыне мокшекс. Прясон: «Мезенди шта тяфта тиень, кивок аф шарьхкодьсаман». Но 130 ломанть ёткса мондедон башка ульсть нинге колма ломатть, конат пяк тёждяста корхтасть мокшекс. И синь аф Мордовиястольхть. Азондан колгаст аф лама.

Венгриянь пара стирть и тяни монь пяк цебярь ялгазень лемоц Марьян Бернхардт. Васендакиге тонафнезе эрзянь кяльть, а сяльде мокшеннеть. Конешна, эрзянь кяльса корхтай аф ламода сяда лац, но тя ёфси аф шоряй теенк. Сон корхтай эрзякс, мон и мокшекс, и эрзякс. Кода минць фкя-фкянь мархта рахсетяма: «Минь махтот корхтатама мокшэрзянь кяльса».

Лия масторонь нинге фкя мокшеть лемоц Кельвин Джексон, и сон американец. Кафта кизода инголе ушедсь тонафнема кяленьконь эса тяса,

Сарансяйса. Сашендсь мокшень кяльть коряс кизонь курсав. Тоса и араме содавиксокс. Пяк кенярдсь монь няемс, кода и мон сонь.

А вага колмоце ломанть тяда инголе мон ашене сотцекшне. Лемоц Наоки – Япононь цёра. Тонафнема васендакиге тяфта же ушедсь эрзянь кяльть эса. Но мекольце пингть тонафни мокшеннеть эса.

Кода пара тейне ульсь ёфси лия масторса, Австрияса, корхтамс эсь родной кяльсон. И мезсь пара – ломаттненди эсь теест мялезост тя кяльсь. И синь оцю мяльса кизефнихть, кода азови тя или тона валсь. Ня ниле шитнень од ялгане тейне арасть нинге сяда малакс.

Докладсна сембонь ульсть эрь кодама тема лангс и эрь кодама кяльса. Корхтасть, сембода сидеста, англакс, сяс мес сонь содазь пцтай сембе. Покодсть разнай секцият: лингвистика, литература, культура, музыкология, экономика и лият. Монь темазе тяфтамоль: «Мокшэрзянь письменно-литературнай кяльхнень тонафнемаснон историясна (17-18 веконь словарнай сёрматфне)». А. П. Феоктистовонь книгаста мон кочкайне и азондыне, кона ученайхне и кода васенцекс тяшнесть минь мокшэрзянь народоньконь колга. Кепотьксонди, васенце валкссь мокшэрзянь кяльса лиссь Амстердамса и автороц сонь Николас Корнелиссон Витсен. Книганц лемоц –«Северная и Восточная Татария».

Конференцияса арань содавиксокс лама од ломань мархта. И фкясь эдост – Ежевика Спиркина – «Ойме» коллективть вятиец. Тяни сон ни лама киза эряй Москуса. Сяс и вестевок ашене няенде, аньцек моронзон кулендине. IFUSCO-са сон омбоцеда. Ётай кизонда ушедозе эрзянь свадьбать колга темать, и тя кизонда поладозе. Лия аймаконь и масторонь участникне оцю мяль вельде эсонза кулхцондсть. Аф кунара «Ойме» коллективть лиссь нинге фкя клипоц. Сёрматф сон Дагестанца и дагестанонь мороть лангс. Кода азозе сонць Ежевикась: «Мон этномузыкологан, и тейне интереснайхть разнай культуратне».

Австриясь кеняртьфтсь лямбосонза и мани шисонза. Минь лама якаме ошть пачк, корхнеме, кулхцондоме и тонафнеме лия кяльхнень эса. Мархонк ашельхть волонтёрхт, минь кода-бди минць сембонь вешендеськ и мушендоськ. И тянь инкса маряськ пряньконь пяк оцюкс. Варжакстомок фкя-фкянь лангс васенцеда, азсак: ёфси аф фкя лацоннетама. Но арьсемок, улема, саят мяльс: сембе минь раднятама – финно-угратама, минь фкя кяльюроньке, фкя прябаланьке, фкя теманьке. Сай IFUSCO-сь ётай Латвияса (минь минць кочкаськ тя вастть). И мон надияфтонь васедемс сембонь мархта кизода меле!

 

Тов

Другие статьи

История и практика перевода Библии на мордовские (эрзя и мокша) языки

  Библиясь - Пазонь Валось – весе лия книгатнень ютксо те сехте покш ды питней книгась окойники ней ули эрзянь ды мокшонь кельсэяк. Те покштояк покш тешкс-невтевкс минек раськенть ванстомантень, минек эрзянь ды мокшонь кельтнень ...

Сделаны для жизни

Искусствовед Татьяна Петровна Прокина человек необычный. Она обладает знаниями тайных знаков мордовской вышивки.  А ведь каждый стежочек, каждый элемент любого орнамента – это магия, это целый мир. Для Татьяны Петровны достаточно ...