Мордовиянь национальной радиось Мордовиянь национальнай радиось

Саранск:0°

вечером: 0° завтра: 0°



История и практика перевода Библии на мордовские (эрзя и мокша) языки

 

Библиясь - Пазонь Валось – весе лия книгатнень ютксо те сехте покш ды питней книгась окойники ней ули эрзянь ды мокшонь кельсэяк. Те покштояк покш тешкс-невтевкс минек раськенть ванстомантень, минек эрзянь ды мокшонь кельтнень ванстомантень.

Эрзянь ды мокшонь кельс Библиянь васенце ютавтовкстнэ теезельть кевейксэеце пингестэнть. Эрзянь кельсэ ниле евангелиятне лиснесть вейке тежа кавксосядт комсь васенце иестэнть ды вейке тежа вейксэсядт кеменце  иестэнть. Эряви меремс, те тевсэнть ули покш таликаст минек раськенть чоподасто валдос ветицятнень Авксентий Юртовонь ды Макар Евсевьевень.

Теде мейле Библиянь ютавтомась минек кельтнес сезевсь ламо иес. Одс те тевесь ушодовсь ансяк комсеце пингенть прядовомсто. 1973-це иестэ саезь башка-башка лиснесть седикеле нолдазь ниле Евангелиятне, седе тов вейке-вейке мельга нолдазельть Библиянь зярыя книгань од ютавтовкст. Ламонень пачкодсть Библиянь ёвтнематне: Иисусонь эрямозо (нолдазь 1991-це иестэ) ды Библиянь ловноматне (нолдазь 1993-це иестэ) кода эрзянь, истя мокшонь кельсэяк.

Эряви меремс, финнэнь-угрань кельтнес Библиянть ютавтоманзо эсь шкасто баславизе –чанстизе Алексий Патриархось. А вана зярдо Мордовияв сакшнось Кирилл Патриархось, сон евтызе мельспаронзо сень кувалма, што Пазонь валось ютавтови эрзянь ды мокшонь кельтнес.

Ледстявлинь оште вейке ломаненть лемензэ. Те хорватось Борислав Арапович, самай сон од шкатнестэ, 1975-1990 иетнестэ, ушодызе Библиянь ютавтоманть мода-масторонь  ламо раськетнень кельтнес. Сон теизе Библиянь ютавтомань васенце институтонть Швециясо, мейле истямо институт панжсь Московсо. Борислав Араповичень ушодксонзо коряс Библиясь эли башка сонзэ книгатне ютавтозь ды нолдазь ней уш колмо тёжат ветесядто ламо кельтнес, а вана весемезэ модамасторонть лангсо эриця кельтнеде малав сисем тёжат. Целанек весе Библиясь ютавтозь котосядто ламо кельтнес, Од Вейсэньлувось – вейке тёжа ветесядт кельтнес, башка книгатне – вейке тёжа кавтосядто ламо кельтнес. Ломаненть эрямонь весе пингензэ перть Библиясь каднови сехте ютавтовиця книгакс.

Ды вана ней минек мельспаронок: Эрзянь кельсэ Од Вейсэньлувось лиссь 2006-це иестэ, Псалтиресь – 2011 иестэ, мокшонь кельсэ Од Вейсэньлувось лиссь 2016-це иестэ! Тенень поладан: эрзянь кельсэ Од Вейсэньлувонь аудиозаписесь ули интернетсэ ды андроидсэ, эряви ансяк Яндекссэ теемс истямо тешкс: Bible.is ды муемс тосо эрявиксэнть.

Тешкстасынь сеть ломантнень, кить топавтызь те тевенть. Эрзянь кельс ютавтсть Библиянть Дмитрий Тимофеевич Надькин, Нина Семеновна Адушкина, Генрих Иванович Горбунов, Генрих Сергеевич Девяткин, Геннадий Иванович Батков. Мейле те тевенть топавтомо карминек мон ды Татьяна Дмитриевна Рябова. Мокшонь кельс ютавтыцятне Валентина Ивановна Мишанина, Антонина Николаевна Келина, Осип Егорович  Поляков. Ней весе ютавтоманть теи Ольга Кулаева – Кугаппи.

Кода топавтови минек тевесь? - Васняяк ютавттано Синодальной ютавтовксонть эйстэ тексттнэнь эрзянь кельс. Мейле минек мельга ютавтовксонть ваны редактор, кона парсте содасы эрзянь ды рузонь келенть. Монь марто ламо иеть важоди Мирьям Макконен, теде икеле оште важодсь Риитта Пююкке. Риитта тонавтнесь эрзянь келенть минек университетсэ, сонськак тонавтсь студентнэнь финнэнь келень содамо. Редактор марто важодемадо мейле минек ютавтовкстнэнь тонавтни консультантось. Мартонок седикеле важодсь Фил Пайк англичанинэсь, ней важоди Роберт Бугенхаген американецэсь. Сынь пек парсте содасызь Библиянть евреень ды грекень кельсэ ды ламо лия кельсэяк. Весе неть ломантне алкуксонь, сынст эрямост кеместэ сюлмавозь Пазонть марто. Истя, Роберт 40 иеть эрясь Папуа-Новая Гвинея усиясонть, Фил Пайк – Австралиясо, сынь пачтясть Пазонь Валонть тосо эриця вишка раськетненень, тонавтызь сынст сёрмадомо-ловномо тиринь кельсэст.

Теде мейле, кода уш весе тонавтнезь-ванозь, минь мольтяно районтнэва эриця эрзятненень, мартост вейсэ ловнотано анокстазь тексттнэнь ды вантано, кода сынь чарькодевить. Апробациядонть мейле совавтано витевкст – те сень кис: седе парсте чарькодевельть минек ютавтовкстнэ.

Од Вейсэньлувонь книгасонть конат-конат таркатнесэ  улить лопатнень песэ кандовкст-сёрмадовкст, косо панжови валтнэнь смустест, мезесь лезды ловныцянтень седе домкасто чарькодемс сёрмадозенть. Книганть песэ максовить Библиянь валкс, ташто ды од валтнэнь валкс ды лия информация.

Нама, улевельтькак минек озатятнень ютксо эрзянь келенть содыцят, сестэ седе пароль. Вана удмуртонь кельс Библиянть ютавтызе православной священник отец Михаил, содавикс  лингвистэсь ды религиозной публицистэсь, филологической наукань докторось Михаил Гаврилович Атаманов. Минек истямо ломаненек  - те Климент епископось. Кода содатано, сон педе пес ванызе ды ловнызе мокшонь кельсэ нолдамс анокстазь Од Вейсэньлувонть, ды мейле ёвтызе эсь валонзо книганть ушодкссо.

Ней эрзянь ды мокшонь кельсэ моли покш важодема Ташто Вейсэньлувонть лангсо. Эрзянь кельс уш зярыя иеть анокт нолдамс вете текстт-книгат. Кадовсь ансяк минек митрополиянть баславамозо.

Ютавтома тевенть минек масторсо лади-теи Московсо Библиянь ютавтомань институтось, а вана сонзэ филиалось – Хельсинкинь институтось важоди финнэнь-угрань кельтнес Библиянть ютавтоманзо лангсо. Мекс минек марто те тевенть топавты омбо масторонь институтось? - Те моли умоконь-умок теевезь коенть эйстэ, зярдо оштё революциядо икеле Суоминь ученойтненень максозель тев тонавтнемс финнэнь-угрань раськетнень коест-кирдаст. Библиянь ютавтоманть ветямось, можна меремс, полады сеть умонь койтнень.

Прядовлия эсь валом вана кода. Минек кельтнес Библиянь ютавтомась – те покштояк покш тев. Ютавтомань тевесь невтизе: арась мезеяк, мезе бу а ютавтоволь минек кельтнес. Весе валтнэ муевсть, муевсть весе чарькодематне. Арсян, эрзянь ды мокшонь кельсэ Библиясь пек сюпалгавтсынзе  минек кельтнень, эдь тосо максовить пек ламо валт, конат те шкас арасельть минек валкстнэсэ – сынь эзть редявкшно, прок буто эзть эрявояк. Библиясо сюпав терминологиясь – сонгак аламонь-аламонь совавтови минек кельтнес. Псалтиренть коряс мон анокстынь эрзянь-рузонь ды рузонь-эрзянь валкс, арсян сонзэ маласо шкасто нолдамонзо.

Республикасо ды сонзэ томбале эриця эрзятне ды мокшотне, кить бажить содамс тиринь келенть ды бажить содамс Пазонь Валонть, паро мельсэ ловныть Од Вейсэньлувонть ды Псалтиренть. Ули мель: кадык весе нолдазь книгатне мусызь эсь ловныцяст.

Т.С.Баргова, переводчик Библии на эрзянский язык

 

Тов

Другие статьи

IFUSCO-сь нинге весть кочказень марс финно-угратнень

IFUSCO – тяфта лемоц народъётконь конференциять, кона аноклави и ётафтови финно-угратнени. Тядде сон 35-цесь. Колмогемонь ветексть ни кочкавихть марса од ломаттне масторлангонь эрь кодама уженяста и масторлангонь эрь кодама уженяс. Ётай ...

Сделаны для жизни

Искусствовед Татьяна Петровна Прокина человек необычный. Она обладает знаниями тайных знаков мордовской вышивки.  А ведь каждый стежочек, каждый элемент любого орнамента – это магия, это целый мир. Для Татьяны Петровны достаточно ...